Saga Augnlækna Reykjavíkur

Landakotsspítali tók til starfa í október 1902 og var augnlæknum veitt aðstaða þar fyrir sjúklinga sína, sem fylgdi þeim öldina á enda. Það var þó ekki fyrr en árið 1969 að formleg augndeild var loks stofnuð á Landakoti. Í september 1973 tók göngudeild augndeildar til starfa á neðri hæð Öldugötu 17, sem var áður innréttuð sem íbúð. Árið 1989 keypti Landakotsspítali líka efri hæð og ris og var þá allt húsið komið í eigu spítalans og nýtt undir starfsemi göngudeildarinnar. Landakotsspítali var sameinaður Landsspítala 1996.

Um aldamótin 2000 flutti augndeildin á Landspítala Háskólasjúkrahús. Í kjölfarið tóku sérfræðingar deildarinnar yfir starfsemi Öldugötu 17. Þá var farið að þrengja að starfseminni enda mikil þróun í tækjabúnaði sem krafðist sérhæfðara húsnæðis. Árið 2004 flutti fyrrnefnd stofa  frá Öldugötu 17 í Hamrahlíð 17 og var nafninu þá breytt í Augnlæknar Reykjavíkur. Nýir sérfræðingar hafa bæst í hópinn og aðrir hafa helst úr lestinni á þessum árum.

Hjá Augnlæknum Reykjavíkur sinna sérfræðingar okkar forvörnum, greiningu og meðferð á gláku, augnsjúkdómum barna og sjúkdómum í augnbotnum svo sem ellihrörnun eða skemmdum vegna sykursýki. Stofan er vel tækjum búin og býr stofan yfir fullkomnum tækjum til myndgreiningar og rannsókna á augnsjúkdómum, sem og leysitæki sem mest eru notuð við við meðferð á gláku og augnbotnasjúkdómum svo sem ellihrörnun og sykursýki í augnbotnum en einnig í tengslum við aðgerðir vegna skýs á augasteini.

Í desember 2025 flutti stofan í nýtt og glæsilegt húsnæði á 5. hæð í Hamrahlíð 17, þar sem enn betur fer um starfsmenn og skjólstæðinga.